Tíðarfar í október 2022
Stutt yfirlit
Október var tiltölulega kaldur um mest allt land, þó var hlýtt í byrjun og lok mánaðar. Fyrri hluti mánaðarins var úrkomusamur, sérstaklega á norðan- og austanverðu landinu. Töluverð úrkoma féll á norðaustanverðu landinu í óveðri sem gekk yfir landið þ. 9. og þar snjóaði víða í byggð. Seinni hluti mánaðarins var hægviðrasamur og tíð almennt góð.
Hiti
Meðalhiti í Reykjavík í október var 4,9 stig og er það jafnt meðallagi áranna 1991 til 2020 en 0,5 stigum undir meðallagi síðustu tíu ára. Á Akureyri var meðalhitinn 2,8 stig, 0,7 stigum undir meðallagi áranna 1991 til 2020 en 1,1 stigi undir meðallagi síðustu tíu ára. Í Stykkishólmi var meðalhitinn 4,6 stig og 5,6 stig á Höfn í Hornafirði.
Meðalhita og vik á fleiri stöðum má sjá í efirfarandi töflu.
| stöð | meðalhiti °C | vik 1991-2020 °C | röð | af | vik 2012-2021 °C |
| Reykjavík | 4,9 | 0,0 | 55 | 152 | -0,5 |
| Stykkishólmur | 4,6 | 0,2 | 55 til 56 | 177 | -0,4 |
| Bolungarvík | 4,0 | 0,2 | 47 til 48 | 125 | -0,5 |
| Grímsey | 3,7 | -0,1 | 57 | 149 | -0,8 |
| Akureyri | 2,8 | -0,7 | 84 | 141 | -1,1 |
| Egilsstaðir | 3,3 | -0,4 | 36 til 37 | 68 | -0,9 |
| Dalatangi | 5,3 | 0,2 | 34 | 85 | -0,4 |
| Teigarhorn | 5,2 | 0,2 | 40 | 150 | -0,1 |
| Höfn í Hornaf. | 5,6 | 0,1 | |||
| Stórhöfði | 5,8 | 0,4 | 36 | 145 | 0,0 |
| Hveravellir | -0,9 | -0,3 | 31 til 32 | 58 | -0,8 |
| Árnes | 3,8 | -0,1 | 59 | 143 | -0,4 |
Meðalhiti og vik (°C) í október 2022
Október var tiltölulega kaldur um land allt. Þó var hlýtt í byrjun og lok mánaðarins. Að tiltölu var kaldast á Norðausturlandi en hlýrra á sunnanverðu landinu. Neikvætt hitavik miðað við síðustu tíu ár var mest -1,8 stig á Ólafsfirði og Reykjum í Fnjóskadal. Jákvætt hitavik miðað við síðustu tíu ár var mest 0,3 stig á Gagnheiði og Kvískerjum.
Hitavik (°C) sjálfvirkra stöðva í október miðað við síðustu tíu ár (2012 til 2021).
Meðalhiti mánaðarins var hæstur 6,9 stig á Steinum undir Eyjafjöllum en lægstur -2,2 stig á Sátu norðan Hofsjökuls. Í byggð var meðalhitinn lægstur í Möðrudal, -0,6 stig.Hæsti hiti mánaðarins mældist 16,0 stig á Teigarhorni þ. 2. Mest frost í mánuðinum mældist -13,7 stig á Grímsstöðum í Fjöllum þ. 21., sem er jafnframt mesta frostið sem mældist í byggð í mánuðinum.
Úrkoma
Fyrri hluti mánaðarins var úrkomusamur, sérstaklega á norðan- og austanverðu landinu. Töluverð úrkoma féll á norðaustanverðu landinu í óveðri sem gekk yfir landið þ. 9. og þar snjóaði víða í byggð.
Úrkoma í Reykjavík mældist 79,7 mm sem er jafnt meðallagi áranna 1991 til 2020. Á Akureyri mældist úrkoman 109,4 mm sem er um 50% umfram meðalúrkomu áranna 1991 til 2020. Í Stykkishólmi mældist úrkoman 69,6 mm og 97,3 mm mældust á Höfn í Hornafirði.
Dagar þegar úrkoma mældist 1,0 mm eða meiri í Reykjavík voru 11, tveimur færri en í meðalári. Á Akureyri mældist úrkoma 1,0 mm eða meiri 14 daga mánaðarins, þremur fleiri en í meðalári.
Sólskinsstundafjöldi
Sólskinsstundir
í Reykjavík mældust 109,8 í október sem er 18,2 stundum yfir
meðallagi áranna 1991 til 2020. Á Akureyri mældust
sólskinsstundirnar 92,0, sem er 44,1 stund yfir meðallagi áranna
1991 til 2020. Þetta er sólríkasti októbermánuður á Akureyri
síðan 1986.
Vindur
Vindur á landsvísu var 0,5 m/s undir meðallagi. Norðlægar áttir voru tíðar fyrri hluta mánaðarins. Slæmt óveður gekk yfir landið þ. 9. (norðvestanátt). Seinni hluti mánaðarins var hægviðrasamur.
Loftþrýstingur
Meðalloftþrýstingur í Reykjavík mældist 999,7 hPa og er það 4,6 hPha undir meðallagi áranna 1991 til 2020.
Hæsti loftþrýstingur mánaðarins mældist 1031,9 hPa í Garðabæ-Urriðaholti og í Surtsey þ. 18. Lægstur mældist þrýstingurinn 957,3 hPa á Fonti þ. 4.
Fyrstu tíu mánuðir ársins
Meðalhiti í Reykjavík fyrstu tíu mánuði ársins var 6,0 stig sem er 0,1 stigi yfir meðallagi áranna 1991 til 2020, en 0,2 stigum undir meðalhita síðustu tíu ára. Meðalhitinn raðast í 26. sæti á lista 152 ára. Á Akureyri var meðalhiti mánaðanna tíu 5,2 stig sem er 0,2 stigum yfir meðallagi áranna 1991 til 2020, en 0,2 stigum undir meðalhita síðustu tíu ára. Meðalhitinn þar raðast í 23. til 24. sæti á lista 142 ára.
Heildarúrkoma fyrstu tíu mánaða ársins í Reykjavík var 951,7 mm og er það 37% umfram meðallag áranna 1991 til 2020. Heildarúrkoma hefur aðeins tvisvar sinnum mælst meiri í Reykjavík yfir þessa tíu mánuði en nú, en það var árin 1921 og 1959. Á Akureyri mældist heildarúrkoma mánaðanna tíu 468,0 mm, sem er 8% umfram meðalúrkomu áranna 1991 til 2020.
Skjöl fyrir október
Meðalhiti
á sjálfvirkum veðurstöðvum í október 2022
(textaskjal).
Daglegt yfirlit mánaðarins á þremur ákveðnum veðurstöðvum er hægt að sækja í sérstaka töflu.
