Fréttir
Fyrsti snjór vetrarins féll á Norðurlandi. Alhvítir dagar á Akureyri voru 7, þrír fleiri en í meðalári. Hér mynd tekin 27. október á hádegi. (Mynd: MODIS/NASA)

Tíðarfar í október

Stutt yfirlit

1.11.2019


Tíð í október var nokkuð sveiflukennd. Í mánuðinum voru allmargir hlýir dagar en einnig kaldir dagar á milli. Að tiltölu var hlýjast vestanlands en svalara og úrkomusamara norðan- og austanlands. Fyrsti snjór vetrarins féll á Norðurlandi.

Hiti

Meðalhiti í Reykjavík var 5,4 stig og er það 1,0 stigum yfir meðallagi áranna 1961 til 1990, en 0,2 stigum yfir meðallagi síðustu tíu ára. Á Akureyri var meðalhitinn 3,1 stig, 0,1 stigi yfir meðallagi áranna 1961 til 1990, en -0,9 stigum undir meðallagi síðustu tíu ára. Í Stykkishólmi var meðalhitinn 5,0 stig og 4,7 stig á Höfn í Hornafirði.

Meðalhita og vik á fleiri stöðvum má sjá í töflu.

stöð meðalhiti °C vik 1961-1990 °C röð af vik 2009-2018 °C
Reykjavík 5,4 1,0 35 149 0,2
Stykkishólmur 5,0 1,1 40 174 0,0
Bolungarvík 4,4 1,0 34 122 0,0
Grímsey 4,5 1,5 27 146 0,0
Akureyri 3,1 0,1 72 139 -0,9
Egilsstaðir 3,3 0,2 35 til 36 65 -1,1
Dalatangi 4,8 0,3 44 til 45 82 -0,9
Teigarhorn 4,7 0,3 59 147 -0,9
Höfn í Hornaf. 4,7


-0,6
Stórhöfði 5,7 0,7 39 til 40 142 -0,2
Hveravellir -0,4 0,8 22 55 -0,3
Árnes 4,1 0,6 52 140 -0,2
Meðalhiti og vik (°C) í október 2019.

Að tiltölu var hlýjast um landið vestanvert en kaldast á Austurlandi (sjá mynd). Jákvætt hitavik miðað við síðustu tíu ár var mest 0,4 stig á Keflavíkurflugvelli og á Reykjanesbraut. Neikvætt hitavik var mest -1,4 stig á Gagnheiði.


Hitavik sjálfvirkra stöðva í september miðað við síðustu tíu ár (2009-2018).

Meðalhiti mánaðarins var hæstur í Surtsey 6,8 stig en lægstur -2,5 stig á Gagnheiði. Í byggð var meðalhitinn lægstur 0,1 stig í Möðrudal.

Hæsti hiti mánaðarins mældist 15,3 stig í Grindavík þ. 8. Mesta frost í mánuðinum mældist -17,1 stig á Grímsstöðum á Fjöllum þ. 23.

Úrkoma

Mánuðurinn var fremur þurr á Vesturlandi en úrkomusamara var á Norðaustur- og Austurlandi.

Úrkoma í Reykjavík mældist 77,4 mm sem er um 90% af meðalúrkomu áranna 1961 til 1990. Á Akureyri mældist úrkoman 97,6 mm sem er 70% umfram meðallag áranna 1961 til 1990. Í Stykkishólmi mældist úrkoman 31,4 mm sem er meira en helmingi minna en meðallag áranna 1961 til 1990. Á Höfn mældist úrkoman 156,8 mm.

Dagar þegar úrkoma mældist 1,0 mm eða meiri í Reykjavík voru 10, fimm færri en í meðalári. Á Akureyri mældist úrkoman 1,0 mm eða meiri 11 daga sem eru jafn margir og í meðalári.

Alhvítir dagar á Akureyri voru 7, þrír fleiri en í meðalári. Í Reykjavík var alautt allan mánuðinn.

Sólskinsstundafjöldi

Sólskinsstundir í Reykjavík mældust 82,0 sem er 1,5 stundum færri en að meðaltali 1961 til 1990. Á Akureyri mældust sólskinsstundirnar 67,6 sem er 16,1 stund yfir meðallagi áranna 1961 til 1990.

Vindur

Vindur á landsvísu var 0,6 m/s yfir meðallagi. Austanáttir voru ríkjandi í mánuðinum en sunnan og norðanáttir skiptust á. Hvassast var á landinu þ. 24. (norðanhvassviðri).

Loftþrýstingur

Meðalloftþrýstingur í mánuðinum mældist 1008,2 hPa er það 5,9 hPa yfir meðallagi áranna 1961 til 1990. Hæsti loftþrýstingur mánaðarins mældist 1036,4 hPa á Eyrarbakka og á Reykjavíkurflugvelli þ. 28. Lægstur mældist loftþrýstingurinn 969,3 hPa í Önundarhorni undir Eyjafjöllum þ. 7.

Fyrstu tíu mánuðir ársins

Meðalhiti fyrstu tíu mánuði ársins í Reykjavík var 6,7 stig sem er 1,6 stigum ofan meðallags áranna 1961 til 1990 en 0,4 stigum yfir meðallagi síðustu tíu ára. Meðalhitinn raðast í 6.sæti á lista 149 ára. Á Akureyri var meðalhiti mánaðanna tíu 5,3 stig. Það er 1,2 stigum ofan meðallags áranna 1961 til 1990 en jafnt meðallagi síðustu tíu ára. Meðalhitinn þar raðast í 18. sæti á lista 139 ára. Úrkoma í Reykjavík hefur verið 12% umfram meðallag og 30% umfram meðallag á Akureyri.

Skjöl fyrir október

Meðalhiti á sjálfvirkum veðurstöðvum í október 2019 (textaskjal).
Daglegt yfirlit mánaðarins á þremur ákveðnumveðurstöðvum er hægt sækja í sérstaka töflu.









Aðrir tengdir vefir



Þetta vefsvæði byggir á Eplica