---

Tíðarfar í desember 2023

Stutt yfirlit

3.1.2024

Desember var kaldur um land allt, en tíð almennt góð. Mánuðurinn var hægviðrasamur og þurr. Að tiltölu var kaldast inn til landsins á norðanverðu landinu en hlýrra við suðurströndina.

Hiti

Meðalhiti í Reykjavík í desember var -1,2 stig. Það er 1,9 stigum undir meðallagi áranna 1991 til 2020 en 1,6 stigum undir meðallagi síðustu tíu ára. Á Akureyri var meðalhitinn -4,4 stig, 3,7 stigum undir meðallagi áranna 1991 til 2020 en 3,3 stigum undir meðallagi síðustu tíu ára. Í Stykkishólmi var meðalhiti mánaðarins -1,8 stig og -0,3 stig á Höfn í Hornafirði. Meðalhiti í byggðum landsins var 2,4 stigum undir meðallagi áranna 1991 til 2020.

Meðalhita og vik frá fleiri stöðum má sjá í eftirfarandi töflu.

stöð	meðalhiti °C	vik 1991-2020 °C	röð	af	vik 2013-2022 °C
Reykjavík	-1,2	-1,9	116	153	-1,6
Stykkishólmur	-1,8	-2,2	140 til 141	178	-1,9
Bolungarvík	-1,8	-1,9	103	126	-1,8
Grímsey	-0,8	-1,5	98	150	-1,4
Akureyri	-4,4	-3,7	131	143	-3,3
Egilsstaðir	-4,1	-3,0	62	69	-2,8
Dalatangi	0,6	-1,1	59	86	-1,3
Teigarhorn	-0,5	-1,5	110 til 112	151	-1,6
Höfn í Hornaf.	-0,3				-1,3
Stórhöfði	1,9	-0,4	69	147	-0,2
Hveravellir	-8,5	-3,4	53	59	-3,0
Árnes	-3,0	-2,1	115 til 116	144	-1,9

Meðalhiti og vik (°C) í desember 2023

Desember var kaldur. Þó svo að kuldinn hafi ekki verið í neinni líkingu við kuldatíðina sem ríkti í desember í fyrra, þá var þetta með kaldari desembermánuðum þessara aldar. Meðalhiti var langt undir meðaltali á landinu öllu. Að tiltölu var kaldast inn til landsins á norðanverðu landinu en hlýjast við suðurströndina. Neikvætt hitavik miðað við síðustu tíu ár var mest -4,5 stig á Sauðárkróksflugvelli, en minnst -0,2 stig í Surtsey.

Hitavik (°C) sjálfvirkra stöðva í desember miðað við síðustu tíu ár (2013 til 2022).

Meðalhiti mánaðarins var hæstur í Surtsey, 3,0 stig. Lægstur var meðalhitinn við Sátu norðan Hofsjökuls, -9,3 stig. Í byggð var meðalhitinn lægstur við Mývatn, -7,9 stig.

Hæsti hiti mánaðarins mældist 12,9 stig á Skjaldþingsstöðum þ. 3. Mest frost í mánuðinum mældist -26,2 stig við Veðivatnahraun þ. 22. Mest frost í byggð mældist -24,4 stig í Möðrudal þ. 29.

Úrkoma

Desember var tiltölulega þurr um land allt. Það var óvenjulega þurrt fram eftir mánuðinum á sunnan og vestanverðu landinu, en þar var úrkomusamara þegar líða tók á mánuðinn. Á Austurlandi mældist heildarúrkoma mánaðarins víða vel undir því sem vanalegt er í desember, t.a.m. á Dalatanga, Skjaldþingsstöðum og Miðfjarðarnesi þar sem úrkoma mældist um þriðjungur af meðalúrkomu áranna 1991 til 2020.

Úrkoma í Reykjavík mældist 77,0 mm sem er um 80% af meðalúrkomu áranna 1991 til 2020. Á Akureyri mældist úrkoman 54,8 mm sem er 75% af meðalúrkomu áranna 1991 til 2020. Í Stykkishólmi mældist úrkoman í desember 51,3 mm og 55,8 mm á Höfn í Hornafirði.

Dagar þegar úrkoma mældist 1,0 mm eða meiri í Reykjavík voru 14 sem eru jafn margir og í meðalári. Á Akureyri mældist úrkoma 1,0 mm eða meiri 9 daga sem er þremur færri en í meðalári.

Snjór

Alhvítir dagar í Reykjavík voru 14 í desember sem er 2 dögum fleiri en að meðaltali 1991 til 2020. Alhvítir dagar á Akureyri voru 23, fimm fleiri en að meðaltali 1991 til 2020.

Sólskinsstundafjöldi

Sólskinsstundir í Reykjavík mældust 27,4 sem er 14,8 stundum yfir meðallagi áranna 1991 til 2020. Á Akureyri mældust sólskinsstundirnar 1,1 sem er rétt yfir meðallagi áranna 1991 til 2020.

Vindur

Mánuðurinn var hægviðrasamur. Vindur á landsvísu var 1,2 m/s undir meðallagi. Hvassast var dagana 14. til 15. (suðvestanátt).

Loftþrýstingur

Meðalloftþrýstingur í Reykjavík mældist 1003,2 hPa sem er 4,0 hPa yfir meðallagi áranna 1991 til 2020. Hæsti loftþrýstingur mánaðarins mældist 1034,2 hPa á Hólum í Dýrafirði þ. 1. Lægsti loftþrýstingur mánaðarins mældist 955,3 hPa á Reykhólum þ. 14.

Skjöl fyrir desember

Meðalhiti á sjálfvirkum veðurstöðvum í desember 2023 (textaskjal).
Daglegt yfirlit mánaðarins á þremur veðurstöðvum er hægt að sækja í sérstaka töflu.