Mjög hlýtt var á Austurlandi um miðjan mánuðinn og mældist hitinn víða vel yfir 20 stig. Hér baðar Snæfell sig í kvöldsólinni í byrjun ágúst.

Tíðarfar í ágúst 2020

Stutt yfirlit

2.9.2020

Ágúst var fremur hlýr, sérstaklega á Norðausturlandi. Meðalhitinn í ágúst var víðast hvar hærri en meðalhiti júlímánaðar. Fyrri hluti mánaðarins var mjög úrkomusamur sunnan- og vestanlands. Á meðan var hlýtt á Norður- og Austurlandi. Mjög hlýtt var á Austurlandi um miðjan mánuðinn og mældist hitinn víða vel yfir 20 stig.

Hiti

Meðalhiti í Reykjavík í ágúst var 11,2 stig og er það 0,9 stigum yfir meðallagi áranna 1961 til 1990, en jafn meðallagi síðustu tíu ára. Á Akureyri var meðalhitinn 12,0 stig, 2,0 stigum yfir meðallagi áranna 1961 til 1990, en 1,5 stigum yfir meðallagi síðustu tíu ára. Í Stykkishólmi var meðalhitinn 10,6 stig og 10,4 stig á Höfn í Hornafirði.

Meðalhita og vik á fleiri stöðvum má sjá í töflu.

Meðalhiti og vik (°C) í ágúst 2020

Ágúst var fremur hlýr. Á flestöllum stöðum var meðalhiti ágústmánaðar hærri en meðalhitinn í júlí. Að tiltölu var hlýjast inn til landsins á Norðausturlandi en að tiltölu kaldast við suður- og vesturströndina. Jákvætt hitavik miðað við síðustu tíu ár var mest 2,3 stig við Upptyppinga. Neikvætt hitavik miðað við síðustu tíu ár var mest -0,9 stig við Garðskagavita.

Hitavik sjálfvirkra stöðva í ágúst miðað við síðustu tíu ár (2010–2019).

Meðalhiti mánaðarins var hæstur á Akureyri 12,0 stig en lægstur 5,7 stig á Þverfjalli. Á láglendi var meðalhitinn lægstur 8,6 stig í Seley.

Hæsti hiti mánaðarins mældist 26,3 stig á Neskaupsstað þ. 13. og er það jafnframt hæsti hiti ársins til þessa. Mjög hlýtt var á Austurlandi um miðjan mánuðinn og mældist hitinn þar víða vel yfir 20 stig. Mest frost í mánuðinum mældist -3,8 stig á Grímsstöðum á Fjöllum þ. 20.

Úrkoma

Mjög úrkomusamt var á Suður- og Vesturlandi í byrjun mánaðar.

Úrkoma í Reykjavík mældist 93,0 mm sem er 50% umfram meðallag áranna 1961 til 1990. Á Akureyri mældist úrkoman 32,9 mm sem er rétt undir meðallagi áranna 1961 til 1990. Í Stykkishólmi mældist úrkoman 71,2 mm. Á Höfn í Hornafirði mældist úrkoman 204,8 mm sem er það mesta sem mælst hefur á því svæði í ágústmánuði síðan 2004, en þá mældist úrkoman í Akurnesi 233,3 mm.

Dagar þegar úrkoma mældist 1,0 mm eða meiri í Reykjavík voru 16, fjórum fleiri en í meðalári. Á Akureyri mældist úrkoman 1,0 mm eða meiri 6 daga sem er einum færri en í meðalári.

Sólskinsstundafjöldi

Sólskinsstundir í Reykjavík mældust 141,5 sem er 13,3 stundum undir meðallagi áranna 1961 til 1990. Á Akureyri mældust sólskinsstundirnar 176,3 og og er það 41 stundum fleiri en í meðalári.

Vindur

Vindur á landsvísu var nærri meðallagi. Sunnanáttir voru ríkjandi dagana 5. til 16. ágúst.

Loftþrýstingur

Meðalloftþrýstingur í Reykjavík mældist 1007,0 hPa og er það -1,6 hPa undir meðallagi áranna 1961 til 1990. Hæsti loftþrýstingur mánaðarins mældist 1021,7 hPa á Keflavíkurflugvelli og í Garðabæ-Urriðaholti þ. 27. Lægstur mældist loftþrýstingurinn 977,3 hPa í Grindavík þ. 5.

Sumarið það sem af er (júní til ágúst)

Meðalhiti í Reykjavík var 10,7 stig sem er 0,8 stigum yfir meðallagi áranna 1961 til 1990, en -0,4 stigum undir meðallagi síðustu tíu ára. Meðalhiti sumarmánaðanna þriggja í Reykjavík er í 39. sæti á lista 150 ára. Á Akureyri var meðalhitinn 11,0 stig, 1,2 stigum yfir meðallagi áranna 1961 til 1990 en 0,4 stigum yfir meðallagi síðustu tíu ára. Meðalhitinn þar raðast í 21. sæti á lista 140 ára.

Úrkoma í Reykjavík mældist 187,3 mm sem er 14% umfram meðallag áranna 1961 til 1990. Á Akureyri mældist úrkoman 99,3 mm sem og er það rétt ofan meðallags áranna 1961 til 1990. Dagar þegar úrkoma mældist 1,0 mm eða meiri voru 4 fleiri en í meðalári í Reykjavík en 1 færri en í meðalári á Akureyri.

Sólskinsstundir mældust 525,3 í Reykjavík, 38 fleiri en að meðaltali 1961 til 1990 en 30 stundum færri en að meðaltali síðustu tíu ár. Á Akureyri mældust sólskinsstundirnar 586,5 sem er 116 stundum yfir meðallagi áranna 1961 til 1990 og 120 stundum fleiri en að jafnaði í sömu mánuðum síðustu tíu ára.

Fyrstu átta mánuðir ársins

Meðalhiti í Reykjavík fyrstu átta mánuði ársins var 5,5 stig sem er 0,6 stigum ofan meðallags áranna 1961 til 1990 en -0,5 stigum undir meðallagi síðustu tíu ára. Meðalhitinn raðast í 39. til 40. sæti á lista 150 ára. Á Akureyri var meðalhiti mánaðanna átta 5,1 stig. Það er 1,1 stigi ofan meðallags áranna 1961 til 1990 en -0,1 stigi undir meðallagi síðustu tíu ára. Meðalhitinn þar raðast í 22. sæti á lista 140 ára. Úrkoman hefur verið 18% umfram meðallag í Reykjavík, en 25% umfram meðallag á Akureyri.

Skjöl fyrir ágúst

Meðalhiti á sjálfvirkum veðurstöðvum í ágúst 2020 (textaskjal).
Daglegt yfirlit mánaðarins á þremur ákveðnum veðurstöðvum er hægtað sækja í sérstaka töflu.