Tíðarfar í ágúst
Stutt yfirlit
Ágústmánuður var að tiltölu kaldur um allt land. Þó voru hlýindi um norðaustanvert landið undir lok mánaðar og hæsti hiti sumarsins mældist á Mánárbakka þ.30. Fremur sjaldgæft er að hæsti hiti ársins mælist svo síðla árs. Mánuðurinn var almennt þurrari og sólríkari en í meðalári bæði í Reykjavík og á Akureyri.
Hiti
Í ágúst var meðalhiti í Reykjavík 10,2 stig sem er 0,9 stigum undir meðallagi tímabilsins 1991 til 2020 og 1,1 stigi undir meðallagi undanfarins áratugar. Á Akureyri var meðalhitinn 10,0 stig eða 0,7 stigum undir meðallagi áranna 1991 til 2020 og 0,9 stigum undir meðallagi undanfarinna tíu ára. Í Stykkishólmi var meðalhitinn 10,1 stig og á Höfn í Hornafirði var hann 10,2 stig.
Meðalhita og vik frá fleiri stöðum má sjá í eftirfarandi töflu.
| stöð | meðalhiti °C | vik 1991-2020 °C | röð | af | vik 2012-2021 °C |
| Reykjavík | 10,2 | -0,9 | 96 | 152 | -1,1 |
| Stykkishólmur | 10,1 | -0,4 | 63 | 177 | -0,5 |
| Bolungarvík | 9,1 | -0,5 | 65 | 125 | -0,7 |
| Grímsey | 8,3 | -0,5 | 54 | 149 | -0,7 |
| Akureyri | 10 | -0,7 | 66 | 142 | -0,9 |
| Egilsstaðir | 10,2 | -0,2 | 31 | 68 | -0,1 |
| Dalatangi | 9,5 | 0,3 | 21 | 84 | 0,0 |
| Teigarhorn | 9,7 | 0,0 | 27 til 29 | 150 | -0,1 |
| Höfn í Hornaf. | 10,2 | -0,3 | |||
| Stórhöfði | 9,8 | -0,6 | 78 | 146 | -0,6 |
| Hveravellir | 6,1 | -1,2 | 42 til 43 | 58 | -1,4 |
| Árnes | 10,3 | -0,7 | 82 til 83 | 143 | -0,7 |
Meðalhiti og vik (°C) í ágúst 2022
Ágúst var kaldur um allt land. Meðalhiti í ágúst var lægri en meðalhiti ágústmánaðar undanfarinn áratug á nánast öllum veðurstöðvum landsins. Jákvætt hitavik miðað við undanfarin tíu ár var mest 0,1 stig í Seley . Neikvætt hitavik var mest -1,8 stig í Bláfjallaskála.
Hitavik (°C) sjálfvirkra stöðva í ágúst miðað við síðustu tíu ár (2012 til 2021)
Meðalhiti mánaðarins mældist hæstur 11,5 stig á Steinum undir Eyjafjöllum en lægstur 4,0 stig á Þverfjalli. Lægsti mánaðarmeðalhiti í byggð mældist 7,4 stig í Möðrudal.
Hæsti hiti mánaðarins mældist 25,0 stig á Mánárbakka þ. 30., en það er jafnframt hæsti mældi hiti sumarsins. Fremur sjaldgæft er að hámarkshiti sumars mælist svo seint á árinu. Lægsti hiti mánaðarins mældist -4,3 stig á Þingvöllum þ.16.
Úrkoma
Heildarúrkoma mánaðarins mældist 54,8 mm í Reykjavík, eða um 85% af meðalúrkomu áranna 1991 til 2020. Á Akureyri mældust 28,6 mm í ágúst, en það er 69% af meðalúrkomu ágústmánaðar á tímabilinu 1991 til 2020. Í Stykkishólmi mældust 66,4 mm og 107,9 mm á Höfn í Hornafirði.
Úrkoma mældist 1,0 mm eða meiri 8 daga mánaðarins í Reykjavík, eða þremur dögum sjaldnar en í meðalári á tímabilinu 1991 til 2020. Fjöldi daga þegar úrkoma mældist 1,0 mm á Akureyri var 9 sem er einum degi oftar en í meðalári.
Sólskinsstundafjöldi
Í Reykjavík mældust sólskinsstundir mánaðarins 189,2 en það er 24,4 stundum yfir meðallagi áranna 1991 til 2020. Á Akureyri mældust 164,8 sólskinsstundir í ágúst, sem er 26,8 stundum yfir meðallagi tímabilsins 1991 til 2020.
Vindur
Vindur á landsvísu var 0,3 m/s yfir meðallagi áranna 1991 til 2020. Hvassast var þ. 30 (SSA-átt).
Loftþrýstingur
Meðalloftþrýstingur í Reykjavík mældist 1008,1 hPa og er það 0,5 hPa yfir meðallagi áranna 1991 til 2020.
Hæstur mældist loftþrýstingurinn 1028,5 hPa á Teigarhorni þ. 30. Lægsti loftþrýstingur mánaðarins mældist 982,1 hPa á Höfn í Hornafirði þ.19.
Sumarið það sem af er (júní til ágúst)
Sumarið var kalt, sér í lagi þegar sumur þessarar aldar eru skoðuð. Mjög hlýir dagar voru fáir.
Meðalhiti í Reykjavík var 10,1 stig sem er 0,7 stigum undir meðallagi áranna 1991 til 2020, en 0,8 stigum undir meðallagi síðustu tíu ára. Sumarið (júní til ágúst) í Reykjavík var það næstkaldasta á þessari öld, það var kaldara sumarið 2018. En á langa listanum er meðalhiti sumarmánaðanna þriggja í 84. til 85.sæti á lista 152 ára. Á Akureyri var meðalhitinn 10,3 stig, 0,2 stigum undir meðallagi áranna 1991 til 2020 en 0,7 stigum undir meðallagi síðustu tíu ára. Meðalhitinn þar raðast í 60. sæti á lista 142 ára. Meðalhiti sumarsins (júní til ágúst) á Akureyri er 2,5 stigum lægri en meðalhiti sumarsins í fyrra, en það sumar var það hlýjasta á Akureyri frá upphafi mælinga.
Úrkoma í Reykjavík mældist 193,4 mm sem er 23% umfram meðalúrkomu áranna 1991 til 2020. Á Akureyri mældist úrkoma sumarmánaðanna þriggja 96,0 mm sem er jafnt meðallagi áranna 1991 til 2020. Dagar þegar úrkoma mældist 1,0 mm eða meiri voru 4 fleiri en í meðalári í Reykjavík og einnig 4 fleiri en í meðalári á Akureyri.
Sólskinsstundir mældust 537,8 í Reykjavík sem er jafnt meðallagi áranna 1991 til 2020. Á Akureyri mældust sólskinsstundirnar 478,2 sem er 2 færri en að meðaltali áranna 1991 til 2020.
Fyrstu átta mánuðir ársins
Meðalhiti í Reykjavík fyrstu átta mánuði ársins var 5,7 stig sem er við meðallag áranna 1991 til 2020 og 0,3 stigum undir meðallagi síðustu tíu ára. Meðalhitinn raðast í 37. sæti á lista 152 ára. Á Akureyri var meðalhiti mánaðanna átta 5,1 stig. Það er 0,2 stigum yfir meðallagi sama tímabils á árunum 1991 til 2020 en 0,2 stigum undir meðallagi undanfarins áratugar. Þar raðast meðalhitinn í 22. til 23. sæti á lista 142 ára.
Úrkomusamt hefur verið í Reykjavík það sem af er ári, en heildarúrkoman þar mældist 774,3 mm fyrstu átta mánuði ársins. Það er 47% umfram meðallag sömu mánaða árin 1991 til 2020. Heildarúrkoma hefur aðeins tvisvar sinnum mælst meiri í Reykjavík yfir fyrstu 8 mánuði ársins en nú, en það var árið 1921 (788,5 mm ) og 1925 (778,0 mm). Heildarúrkoma fyrstu átta mánuða ársins mældist 344,8 mm á Akureyri, en það er 12% yfir meðallagi 1991 til 2020.
Skjöl fyrir ágúst
Meðalhiti
á sjálfvirkum veðurstöðvum í ágúst 2022 (textaskjal).
Daglegt yfirlit mánaðarins á þremur ákveðnum veðurstöðvum er hægt að sækja í sérstaka töflu.
