Óvenjuleg kuldatíð
Síðustu sex vikur þær köldustu í Reykjavík síðan 1918
Viðvarandi kuldatíð á
landinu síðustu 6 vikur, frá 7. desember 2022 til 19. janúar 2023 er óvenjuleg.
Tímabilið er kaldasta 6 vikna tímabil í Reykjavík frá 1918. Miklar breytingar
urðu á veðrinu nú í nótt þegar lægð með hlýju lofti kom úr suðri yfir landið og
hrakti þar með heimskautaloftið sem hefur verið ríkjandi yfir landinu
undanfarið langt til norðurs.
Hitasvið norðurheimskautsins í u.þ.b.1500 m. hæð. Annað kortið sýnir stöðuna á miðnætti 19. janúar (aðfaranótt fimmtudags). Hitt kortið sýnir stöðuna á miðnætti 21. janúar (aðfaranótt laugardags). Ísland merkt með rauðum hring.
Það hefur verið mjög kalt á landinu öllu en að tiltölu hefur verið kaldast inn til landsins. Kuldatíðin er sérstaklega óvenjuleg á suðvesturhorninu. Ekki hefur verið kaldara í Reykjavík í desember í rúmlega 100 ár, en í desember 1916 var meðalhiti svipaður og í nýliðnum mánuði. Janúar hingað til hefur líka verið kaldur, og er byrjun janúar 2023 sú kaldasta frá því 1979. Síðust 6 vikur eru þær köldustu í Reykjavík síðan 1918, en þá var mikið kaldara á tímabilinu en nú.
Alhvítir dagar í Reykjavík eru sömuleiðis óvenju margir og samfellt hvítt tímabil langt, það er nú komið í 34 daga og hefur einungis 5 sinnum verið lengra.
Miklar hitasveiflur á einum sólarhring
Umskiptin í nótt og morgun hafa verið mikil, sem dæmi má nefna að kl. 06 í gærmorgun (19. janúar) var frostið í Víðidal í Reykjavík -20,4°C, en kl. 06 í morgun var hitinn orðinn 1,9°C. Kl. 10 var hitinn svo kominn í 5°C eins og sjá má á línuritinu hér að neðan.
