Nýr forstjóri Veðurstofunnar hefur tekið til starfa
„Veðurstofan á að vera lipur, framsýn og opin stofnun sem veitir þjónustu byggða á sterkum grunni vísinda“
Nýr forstjóri Veðurstofu Íslands, Hildigunnur H. H. Thorsteinsson hefur tekið til starfa.
Hildigunnur hefur starfað sem tæknistjóri (CTO) hjá jarðhitafyrirtækinu Innargi A/S í Kaupmannahöfn frá árinu 2022. Áður gegndi hún stöðu framkvæmdastýru rannsókna- og nýsköpunar hjá Orkuveitunni í nær áratug. Fyrr á ferlinum starfaði hún í jarðhita bæði á Íslandi og í Bandaríkjunum, lengst af í bandaríska orkumálaráðuneytinu við stýringu rannsóknarfjármagns. Hildigunnur hefur m.a. setið í stjórnum Orku náttúrunnar, Carbfix, og Jarðhitafélags Bandaríkjanna. Hún situr nú í stjórn Orkusölunnar.
Hildigunnur er með BSc gráðu í iðnaðarverkfræði frá Háskóla Íslands og lauk MSc gráðu í Technology and Policy frá Massachusetts Institute of Technology árið 2008.
Það felast alltaf tækifæri í áskorunum
„Veðurstofan á að vera lipur, framsýn og opin stofnun sem veitir þjónustu byggða á sterkum grunni vísinda“, sagði Hildigunnur þegar að hún ávarpaði starfsmenn Veðurstofunnar á dögunum. „Ég ætla okkur að horfa sífellt til framþróunar, hvort heldur sem er í skilvirku innra starfi og góðri menningu, sköpun þekkingar eða í upplýsingamiðlun. Við eigum að vera í fjölbreyttu rannsóknarsamstarfi innan lands og utan því saman erum við sterkari og náum lengra."
"Náttúran bíður sífellt upp á áskoranir og ég geri mér grein fyrir því að þeim hefur fylgt og mun fylgja mikið álag á starfsmenn. En Veðurstofan byggir á traustum grunni til þess að takast á við þessar áskoranir og til þess að nýta þau tækifæri sem felast alltaf í áskorunum“, sagði Hildigunnur.
Umhverfis-,
orku- og loftslagsráðherra, Guðlaugur Þór Þórðarsson, ásamt fyrrverandi forstjóra,
Árna Snorrasyni og nýjum forstjóra Veðurstofu Íslands, Hildigunni H.H.
Thorsteinsson. Embætti forstjóra Veðurstofu Íslands var auglýst í nóvember sl. og
sóttu átta um embættið. Umhverfis-, orku- og loftslagsráðherra skipar í
embættið til fimm ára í senn. (Ljósmynd: Veðurstofa Íslands/Haukur Hauksson)
