Mesta sólarhringsúrkoma sem mælst hefur á landsvísu í júlímánuði mældist í Grundarfirði
Samantekt á atburðum í vatnsveðrinu á Vesturlandi helgina 13.-14. júlí
Um liðna helgi, 13.-14. júlí, var mikið vatnsveður á Vesturlandi. Gul viðvörun var í gildi vegna úrkomu og vinds á Faxaflóa og í Breiðafirði, og var að sama skapi varað við vatnavöxtum og skriðuhættu.
Spár rættust og varð það svo að mikil úrkoma var á Snæfellsnesi og Barðaströnd um liðna helgi. Mesta ákefðin var á laugardeginum og aðfaranótt sunnudags. Í Grundarfirði mældist mesta úrkoman, þ.e. 227 mm af regni sem er mesta úrkoma sem mæld hefur verið á einum sólarhring í Grundarfirði og jafnframt mesta sólarhringsúrkoma sem mæld hefur verið í júlímánuði á landsvísu.
Áhugavert er að þó að úrkomumet hafi verið slegið var ekki mikið um skriðuföll á svæðinu umhverfis Grundarfjörð. Svo virðist sem að þetta svæði sé móttækilegra fyrir aftakaúrkomu en önnur, en samverkandi áhrif jarðfræðilegra- og landslagsaðstæðna gera það að verkum að skriðuhætta ógnar ekki byggð. Áður hefur verið aftakaúrkoma á Grundarfirði, t.d. í miklu vatnsveðri í september 2011, þá féllu engar skriður nærri bænum.
Í veðrinu um liðna helgi voru þó miklir vatnavextir og ein skriða féll sunnan við Grundarfjörð. Vatn flæddi yfir vegi beggja vegna bæjarins, úr farvegi Ytri-Búðarár sem er vestan við bæinn og Grundarár austan hans.
Miklir vatnavextir voru víðar á Vesturlandi. Á Skarðsströnd óx Staðarhólsá í Staðarhólsdal mikið. Í Gufudal voru vatnavextir eins og þeir gerast mestir að sögn heimamanna og óx Gufudalsvatn um 1,5 metra og vatn flæddi yfir tún. Aðrar ár sem uxu mikið eru Vatnsdalsá í Vatnsfirði á Barðaströnd og Haffjarðará á Snæfellsnesi.
Skriðuvakt Veðurstofunnar hefur fengið fregnir af skriðum á Skarðsströnd, Barðaströnd, Snæfellsnesi og í Hítardal. Hér sést skriðan í Hítardal á gervitunglamynd. (Mynd: Copernicus Sentinel)
Sjá nánar á bloggi skriðuvaktar Veðurstofu Íslands
Staðsetning skriða sem fregnir hafa borist af.
Ekki er útilokað að fleiri
skriður hafi fallið í vatnsveðrinu og því er búist við því að fleiri
tilkynningar berist þegar skyggni er orðið betra. Allar ábendingar um skriður
eru vel þegnar en Veðurstofan heldur utan um skráningar á skriðuföllum í
samstarfi við Náttúrufræðistofnun Íslands. Það er hægt að hafa samband í síma
522-6000 eða nota skráningarform á vef Veðurstofunnar sem finna má undir „Tilkynna
snjóflóð“ bæði á snjóflóðaforsíðu og eins undir Ofanflóð (listi
t.v.) en þetta vefform dugar jafnt til skráninga á skriðuföllum og snjóflóðum.
Ljósmynd af skriðu undir Hafursfelli á Snæfellsnesi sem Guðmundur Rúnar Svansson sendi skriðuvaktinni.
Skriður sem féllu við bæinn Skjaldvararfoss á Barðaströnd (Ljósmynd: Veðurstofa Íslands)
