Skjálftavirkni 2.-8. október, vika 40, 2023
Ríflega 1100 skjálftar mældust á mælakerfi Veðurstofunnar í þessari viku og hafa um 750 skjálftar verið yfirfarnir. Þessi vika var rólegri en vikan á undan þegar mældust tæplega 1900 skjálftar og munar þar mest um fjölda skjálfta á Reykjanesi. Stærsti skjálfti vikunnar var 4,9 að stærð og varð hann í Bárðarbungu miðvikudaginn 4. október.
Nánar má skoða skjálftavirkni hér: Skjálfta Lísa
Reykjanesskagi og Reykjaneshryggur
Þessa vikuna var mest virkni á Reykjanesskaganum við Fagradalsfjall, Sundhnúkagígaröðina og á svæðinu frá Keili að Kleifarvatni. Tveir skjálftar mældust yfir þremur, einn 3,3 að stærð við Kleifarvatn 5. október og annar 3,2 að stærð við Sundhnúkagígaröðina. Skjálftahrina sem var í gangi við Eldvörp fyrir viku síðan virðist yfirstaðin. Á Reykjaneshrygg rétt utan við Reykjanestá mældist lítil skjálftahrina þriðjudaginn 3. október. Stærsti skjálftinn þar var 3,2 að stærð.
Vesturgosbeltið
Rólegt var á Vesturgosbeltinu þessa vikuna. Um 20 skjálftar mældust við Skjaldbreið og heldur áfram að draga úr virkni þar. 5 skjálftar mældust rétt suðvestan við Hvítárvatn á svæði sem hefur ekki verið mjög virkt í gegnum tíðina. Í vestari hluta Vatnajökuls voru líka örfáir skjálftar.
Suðurlandsbrotabeltið og Hengilssvæðið
Á Hengilssvæðinu var dreifð virkni. Þar mældust m.a. skjálftar í Þrengslunum og þar í kring, í Húsmúla og á Ölkelduhálsi. Á Suðurlandsbrotabeltinu mældust víða skjálftar, m.a. við Hestfjall og vestast á beltinu.
Mýrdalsjökull og Torfajökull
Í Mýrdalsjökli mældust um 30 skjálftar, svipað og vikuna á undan. Í Torfajökli mældust um 10 skjálftar, flestir vestarlega í öskjunni.
Vatnajökull
Í Vatnajökli var mest virkni í Bárðarbungu og í Grímsvötnum. Einnig mældust þrír skjálftar í Öræfajökli og tveir í Kverkfjöllum. Við Þórisvatn mældist einn skjálfti.
Norðurgosbeltið
Skjálftavirkni við Öskju og Herðubreið var mjög svipuð og vikuna á undan, tæplega 30 skjálftar mældust. Í Kröflu mældust um 10 skjálftar og svipað við Þeistareyki.
Tjörnesbrotabeltið
Rólegt á Tjörnesbrotabeltinu þessa vikuna. Helsta virknin var við Grímsey, Kópasker og úti fyrir Eyjafirði. Úti á Kolbeinseyjarhrygg mældust tveir skjálftar.
Skjálftalisti_viku_40
