Höfnin í Stykkishólmi hinn 8. júlí 2014.

Hlýindi ársins 2014

Samanburðarlistar

Trausti Jónsson 29.1.2015

Tekinn var saman listi yfir meðalhita ársins 2014 og hann borinn saman við meðalhita annarra hlýrra ára á 79 veðurstöðvum.

Í yfirlitinu eru allar mannaðar stöðvar sem enn eru starfræktar, auk sjálfvirkra athugana í beinu framhaldi þar sem hefðbundnum mælingum hefur verið hætt. Að auki var litið á mælingar fáeinna sjálfvirkra stöðva þar sem athugað hefur verið lengur en frá 2003. Fjölmargar sjálfvirkar stöðvar eru ekki með á listanum.

Af stöðvunum 79 reyndist árið 2014 það hlýjasta á 49 þeirra. Á 22 stöðvum var það næsthlýjasta árið, það þriðja hlýjasta á sex stöðvum og það fimmta hlýjasta á tveimur.

Hafa verður í huga að þar sem mælt hefur verið mjög lengi hafa breytingar undantekningalaust orðið á bæði stöðvum og í umhverfi þeirra. Í stöku tilviki eru raðirnar misáreiðanleg samsuða nágrannastöðva. Í listunum hér að neðan eru slíkar raðir merktar með stjörnu (*). Á tveimur stöðvum eru raðirnar ekki alveg heilar – ár vantar inn í. Þær eru merktar með striki (-).

Fyrri taflan

Hér að neðan er listanum skipt á tvær töflur. Sú fyrri sýnir hversu mikið vantar upp á að árið 2014 hafi orðið það hlýjasta. Mönnuðu stöðvunum (sumar orðnar sjálfvirkar) er raðað fyrst, en síðan þeim sjálfvirku – þar sem mælt hefur verið mun skemur í flestum tilvikum.

Dálkarnir eru: Árið 2014, sæti (hér á bilinu 2 til 5), meðalhiti ársins 2014, hlýjasta árið til þessa á stöðinni, sæti þess (alltaf einn), meðalhiti hlýjasta ársins, munurinn (hversu mikið vantaði upp á metjöfnun), stöðvarnafn og síðasti dálkurinn sýnir hvenær röðin byrjaði.

Hér er uppgjörið sett fram með tveimur aukastöfum. Það er auðvitað umfram raunverulega nákvæmni – en keppni er keppni.

Hversu mikið vantaði upp á að methiti næðist 2014?
(skoðum 30 stöðvar þar sem 2014 lenti í 2. sæti eða neðar)

Mest vantaði upp á nýtt met á Hveravöllum og á Keflavíkurflugvelli, 0,36 stig. Í flestum tilvikum var árið í öðru sæti og það var langoftast 2003 sem var hlýrra. Árið var í 5. sæti á Gufuskálum og í Bolungarvík. Bolungarvíkurröðin er samsuða nokkurra mæliraða – og gæði hennar því lakari en almennt gerist á listanum. Á fjórum stöðvum, Akureyri, Blönduósi, Hlaðhamri í Hrútafirði og á Seyðisfirði, er 1933 hlýjasta árið; 1941 var hlýjast á Stórhöfða og 1939 á Hæli í Hreppum.

Á sjálfvirku stöðvunum munar mestu á hita ársins 2014 og eldra meti á Þverfjalli. Það er sami munur og í Bolungarvík, en hlýjasta árið ekki það sama, 2010 á Þverfelli. Það er 2003 sem var hlýjast á öllum öðrum stöðvum í sjálfvirka listanum. Þrjár stöðvar á hálendinu eiga 2. til 4. mesta muninn.

Síðari taflan

Hversu miklu hlýrra var árið 2014 en það næsta í röðinni fyrir neðan?
(skoðum 49 stöðvar þar sem 2014 var metár)

Síðari taflan sýnir þær stöðvar þar sem árið 2014 varð það hlýjasta og hversu miklu hlýrra það var en það næsthlýjasta. Dálkafyrirsagnir eru þær sömu – nema hvað miðjuáradálkurinn sýnir hér næsthlýjasta árið.

Árið 2014 varð það hlýjasta um nær allan austurhluta landsins. Raufarhöfn er efst á listanum, árið 2014 varð þar 0,70 stigum hlýrra heldur en næsthlýjasta árið, 2003. Á fjölmörgum stöðvum er munur á 2014 og næsthlýjasta árinu algjörlega ómarktækur – vegna upphækkana úr öðrum aukastaf er það þó misjafnt hvort þær deila lokasæti með öðrum árum. Sem dæmi má taka að á Sámsstöðum verða báðar tölur (sú hæsta og næsthæsta að 6,1 stigi, en á Vatnsskarðshólum þar sem munurinn er aðeins 0,04 stig lendir 2014 í 6,5 stigum, en 2003 í 6,4.

Á tveimur stöðvum með mjög langar mæliraðir er hiti ársins 1933 sleginn út, það er í Reykjahlíð og á Grímsstöðum á Fjöllum. Tölurnar eru þó mjög óvissar í Reykjahlíð vegna mikilla flutninga á stöðinni.

Að lokum, neðst í töflunni, má sjá landsmeðalhita. Þetta eru óformlegir reikningar og er ekki ætlast til þess að þeir séu teknir alvarlega. En tölurnar gefa til kynna að árin 2014 og 2003 hafi verið jafnhlý á landinu í heild.