Sjávarhiti

Sjávarhiti 1882 til 2005

Myndin sýnir loft- og sjávarhita í Grímsey 1882 til 2005. Sjávarhitinn hefur allan þennan tíma verið hærri en lofthitinn að meðaltali og vermandi áhrif sjávar staðið allt tímabilið.

Munur á sjávar- og lofthita er heldur minni undan Norður- en Suðurlandi, því er bratti hitasviðsins í norður/suðurstefnu hér um slóðir meiri í sjó en í lofti. Í Grímsey hefur munurinn lengst af verið 2 til 3°C, en nokkurrar tímabilaskiptingar gætir.

Þegar hafísárin gengu í garð um 1965 óx hitamunur lofts og sjávar, sem þýðir að ívið meira hefur kólnað í lofti en sjó. Freistandi er að kenna auknum norðanáttum hafísáranna um (sjá mynd 2 í Vigurvindur), ásamt aukningu ísþekjunnar norðurundan, en hún veldur því að loft sem kemur að norðan hafði minni tækifæri til upphitunar á leið sinni til Grímseyjar en áður var.

línurit

Mynd 1. Loft- (blár ferill, vinstri kvarði) og sjávarhiti (rauður ferill, vinstri kvarði) í Grímsey (vinstri kvarði) og mismunur þeirra 1882 til 2005 (hægri kvarði). Takið eftir því að sjávarhitinn er hærri en lofthitinn allt tímabilið.

Athyglisverð er sú mismunaraukning sem átti sér stað á öðrum áratugi 20. aldar. Ástæður hennar hafa ekki enn verið greindar, en sennilegt er þó að auknum norðanáttum sé um að kenna.

 




Aðrir tengdir vefir



Þetta vefsvæði byggir á Eplica